Link açıqlığı

Ukraina 2017 senesi «Eurovision» 62-nci halqara yır yarışınıñ keçirilmesinden vazgeçmeycek. Bunı Ukraina baş naziri Vladimir Groysman bildirdi.

«Euroivision» yüksek, güzel bir derecede keçsin diye, elimizden kelgenini yapmaq kerekmiz», – dep ayttı Groysman «1+1» telekanalınıñ yayınında.

Ukrainanı temsil etken Qırımlı yırcı Jamala «Eurovision» yarışında ğalebe qazandı. Yarış finalı İsveçiyanıñ paytahtı Stockholm şeerinde mayıs 15-ke keçer gecesi olıp keçti. Yarış qaidelerine köre, kelecek sene Ukraina «Eurovision» yarışını qabul ete bile, amma vazgeçmek aqqı da bar.

Ukraina «Eurovision» yır yarışında 2003 senesinden itibaren iştirak ete. Ekinci kere iştirak etkende Ukrainanı temsil etken Ruslana «Wild Dances» yırınen ğalebe qazandı. Ukraina er daim güzel neticeler köstere. 2015 senesi memleket öz isteginen yarışqa qoşulmadı. Ukraina birinci milliy kanalı memlekette maliye ve siyasiy vaziyet buña izin bermey, dep bildirgen edi.

XS
SM
MD
LG