Rusiye Tışqı işler nazirliginiñ resmiy vekili Mariya Zaharova Birleşken Milletler Teşkilâtı vekilleri tarafından Moskvağa qarşı qırımtatarlarnı yüzleme qabaatlarından sebep açuvlanğanını bildirdi.
«Birleşken Milletler Teşkilâtınıñ Rusiyege nisbeten sebepsiz ve siyasiy tenqidi oñ yaraşmay. Ep bir dünyada kerçekten olğan şeylerge tayanmaq ve aqiqiy delilerni qullanmaq kerek», – dep ayttı o mayıs 19-da.
Zaharova Birleşken Milletler teşkilâtınıñ İnsan aqları Yuqarı idare komissarınıñ spikeri Rupert Colvilleniñ Rusiyeni yarımadada qırımtatarlarğa qarşı repressiyalarnı toqtatmağa çağırtqan beyanını hatırladı.
O, Birleşken Milletler teşkilâtınıñ uquq qorçalav vaziyetine yanaşmalarını «obyektivsız» saya. Rusiye «qırımtatarlarnıñ vaziyetini eyiliştirmek içün bayağı ğayret köstere», dep inandıra Zaharova.
Halqara uquq qorçalayıcıları ve Meclis Rusiye tarafından yarımadada qırımtatar halqına qarşı repressiyalar aqqında muntazam sürette beyan eteler. Amma yerli akimiyet Kreml kibi, bu beyanlarnı red eteler ve olarğa ziyade arttıruv aytalar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
