Canadada Ontario vilâyetiniñ parlamentinde tarihta ilk sefer qırımtatar bayrağını köterdiler. Bayraqnı kötergen Canada qırımtatarları derneginiñ prezidenti Rustem İrsay Qırım.Aqıqatqa bildirdi ki, bu vaqia genotsidke oğranğan qırımtatarlarğa Canada tarafından büyük maneviy destekni añlata.
Onıñ aytqanına köre, dernek qırımtatar bayrağını kötermek içün Ontario vilâyetiniñ Canadadaki ukrain kongressiniñ sabıq reisi ve şimdi halq deputatı olğan İvan Beykerge muracaat etti.
Parlament azasınıñ Qırım.Aqiqatqa aytqanına köre, mayıs 17-de kelgen teklif içün deputatlar firqağa baqmadan oy berdiler.
Ontario vilâyetiniñ parlamenti yanında mayıs 19-da, cumaaqşamı künü, Canadada iş ziyaretinen bulunğan qırımtatarlarınıñ lideri Mustafa Cemilevniñ iştiraki ile qırımtatar halqı sürgünliginiñ qurbanlarını añma mitingi keçirildi.
Ukraina prezidentiniñ qırımtatar halqı işlerinden vekâletlisi Mustafa Cemilevniñ faaliyetini teminlev ofisinde berilgen malümatqa köre, Mustafa Cemilev Ottava ve Torontonıñ bir qaç universitetinde açıq lektsiya keçirecek, Torontoda matem mitingine qoşulacaq ve Ontarioda qırımtatar bayrağını köterme tedbirinde iştirak etecek.
Ukraina ve halqara uquq qorçalayıcılar Rusiye tarafından yarımada işğalden soñ qırımtatar halqına qarşı repressiyalar aqqında muntazam sürette beyan eteler. Amma Kreml ve boysunğan Qırım akimiyeti bunı red eteler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
