Link açıqlığı

Qırım mahkemesi Meclis reisiniñ muavinini iyül 22 kününe qadar apiste qaldırdı – Smedlâyev


Rusiye kontrol etken Qırım Yuqarı mahkemesi «fevral 26 işiniñ» iştirakçisi, Qırımtatar Milliy Meclisi reisiniñ muavini Ahtem Çiygoznıñ apis cezasını iyül 22 kününe qadar uzattı.

Bunı Qurultay Merkeziy saylav komissiyasınıñ reisi Zair Smedlâyev bildirdi.

«Ahtem Çiygoznıñ apis cezasını 2016 senesi iyül 22 kününe qadar uzattılar», – dep yazdı o Facebookta.

Ahtem Çiygoz mayıs 20-de mahkemede bar edi. Bundan evel onı mahkemege ketirmediler, bu sebepten toplaşuv cuma kününe qaldırılğan edi.

Rusiyege boysunğan Qırım Yuqarı mahkemesi mayıs 13-te «fevral 26 işi» boyunca qabaatlanğan Ahtem Çiygoz ve Ali Asanovnıñ apiste yatma müddetiniñ uzatılması boyunca imayeniñ şikâyet arizasını red etti.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG