Ukraina işğal etilgen topraqlar ve memleket içinde köçip kelgen insanlar meseleleri naziriniñ birinci muavini vazifesine qırımlı Yusuf Kürkçi tayin etildi. O, Ukraina baş naziriniñ qararı mayıs 18-de imzalanğanını Qırım.Aqiqatqa bildirdi.
Kürkçi şimdilik vazifelerini aydınlatmay.
Nazirler şurası saytında nazirniñ birinci muavininiñ tayin etilmesi aqqında vesiqa yoq.
Bundan evel Yusuf Kürkçi Ukraina prezidenti qırımtatar halqı işlerinden vekâletlisi Mustafa Cemilevniñ faaliyetini teminlev bölüginiñ müdiri olğan edi.
2009 – 2011 seneleri Ukraina millet ve din devlet komitetiniñ reis muavini olğan edi. Komitet yoq etilgen soñ Qırımğa qayttı, Rusiyeniñ yarımada işğalinden soñ ise tekrar Kiyevge köçip keldi.
Ukraina Nazirler şurası aprel 20-de Vaqtınca işğal etilgen topraqlar ve memleket içinde köçip kelgen insanlar meseleleri nazirligini meydanğa ketirmege qarar aldı. Onıñ yolbaşçısı Vadim Çernış oldı. O, Donbassnı ğayrıdan tiklev meseleleri devlet agentliginiñ yolbaşçısı olğan edi.
Al-azırdı yañı nazirlikniñ nizamnamesi azırlana.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
