Qırımtatar Milliy Meclisi reisiniñ birinci muavini Nariman Celâl bildirdi ki, mayıs 18-de – sürgünlik yıllığında hatıra aktsiyasına çıqqan qırımtatarlarğa mecburiy işler berildi.
«İslâm-Terekteki balalarnıñ er birini rayon mahkemesi 20 saatlik mecburiy işlernen cezaladı», – dep yazdı Celâl Facebookta.
Mayıs 19-da saba İslâm-Terekte Rusiyeniñ 20.2 maddesi – «Nizamnı bozuv ya da toplaşuv, miting, numayış, yürüş ya da piket ötkerilmesi» boyunca qabaatlanğan dört qırımtatarına nisbeten mahkeme olıp keçti.
Tünevin qırımtatar halqı sürgünliginiñ qurbanlarını añma kününe bağışlanğan matem tedbirleri yerlerine yol alğan 10 maşina aydavcısı yaqalandı. Facialı bir yıllıq munasebetinen Ukraina, Qırım ve bütün dünyada sürgünlik qurbanlarınıñ hatırasına aktsiyalar keçirildi.
18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
