Qırımtatar Milliy Meclisi reisiniñ muavini İlmi Ümerovğa mayıs 19-da Federal havfsızlıq hızmetiniñ Qırım idaresinde keçirilgen sorğudan soñ qabaatı aydınlatıldı.
Bunı adliyecisi Emil Kürbedinov bildire. Qabaat qararı Facebookta Meclis reisiniñ birinci muavini Nariman Celâl tarafından aydınlatıldı.
«İlmi Ümerovnı qabaatlı olaraq celp etkenler. Qararda angi lafları ceza berilmesi içün sebep ola bilgenini bildireler. İlmi Ümerov izaat bermekten vazgeçti. Şimdilik bu qadar. Qararnı aldıq, vaziyetke köre areket etecekmiz», – dep ayttı Kürbedinov.
Mayıs 12-de İlmi Ümerovnıñ evinde tintüv keçirildi, FSB Qırım idaresiniñ taqiqatçısı oña Qırımnı terk etmemek qararını berdi.
Kreml kontrol etken Qırım prokuraturası Ümerovğa qarşı «separatizm» boyunca cinaiy iş açtı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
