Ukraina prezidenti Petro Poroşenko qırımtatarlarnıñ sürgünlik yıllığında qırımtatarlarnıñ vatanı olğan işğal etilgen Qırım üzerindeki kontrolni Ukrainağa qaytarmaq kerek, dep ayttı.
Bunı o, mayıs 18-de Ukraina milliy operasında olıp keçken hatıra aqşamında bildirdi, dep haber ete Qırım.Aqıqat.
«Vazifemiz Qırım yarımadasını rus işğalinden qurtarmaq. Qırımtatarlarğa vatanlarını qaytarmaqtır», - dep ayttı Poroşenko.
«Qırım Ukrainanıñ ayırılımaz parçası edi, bar ve olacaq. Yaman devletni hırsızlağanını qaytarmağa zorlarlar», - dep qoştı o.
18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Ukrainada qırımtatar sürgünligi genotsid olaraq tanıldı. Memlekette bunıñnen bağlı matem tedbirleri keçirilmekte. Sürgünlik qurbanlarını çetelde de añalar.
Er yıl Qırımda sürgünlik kününe bağışlanğan kütleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilmesi yasaq etildi. Qırımtatar Milliy Meclisi bildirdi ki, Qırımdaki regional meclisler Rusiye kontroli altında bulunğan akimiyet mayıs 18 qırımtatar sürgünligi yıllığında matem tedbirleriniñ keçirilmesine izin alamaylar.
Bundan sebep Meclis yarımadadaki semetdeşlerine hatıra yerlerinde sürgünlik qurbanlarını dua ile añmağa tevsiye ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
