Ukraina prezidenti Petro Poroşenko qırımtatar milliy-territorial muhtariyet qurulması içün zarur olğan Ukraina Anayasası deñişmeleriniñ kirsetme esnasını tezleştirmege vade etti.
Bunı o, mayıs 18-de Ukraina milliy operasında keçirilgen hatıra aqşamında ayttı, dep haber ete Qırım.Aqiqat.
«Ukrain, rus ve diger milletlerniñ aq-uquqlarına riayet etüv şartı ile qırımtatar muhtariyetiniñ qurulması kerek olğanını añladıq. Ukraina Anayasasınıñ Qırım Muhtar Cumhuriyeti qısmına deñişmeler kirsetip, qırımtatar halqınıñ kelecegini belgilemek aqqını köz ögüne alacaqmız. Anayasa komissiyasına muracaat etip, eñ yaqın vaqıtta bunıñ kibi deñişmelerni azırlaycaq işçi gruppanı teşkil etmege rica etecem», – dedi Poroşenko.
2015 senesi iyül ayında Ukraina prezidenti yetro Poroşenko Ukraina Anayasasında Qırımda qırımtatarlarnıñ milliy muhtariyeti qayd etilmeli, dep aytqan edi. O, halq deputatlarından Anayasa deñişmelerine qoltutmalarını rica etti.
Herson vilâyetiniñ Qırım ile memuriy sıñırında qırımtatar muhtariyetine hoş keldiñiz dep qarşılağan levha peyda oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
