Link açıqlığı

Ahtem Seytablayevniñ «Onıñ yüregi» filmi milletlerara olacaq


Ekinci cian cenkinde 88 yeudiy balasını qurtarğan qırımtatar qadını aqqında qırımlı olğan Ukraina rejissöri Ahtem Seytablayevniñ «Onıñ yüregi» yañı filmini iyün ayında çıqarmağa başlaycaqlar. Mayıs 17-de Kievde keçken matbuat konferentsiyasında çıqaruv gruppa iştirakçileriniñ aytqanlarına köre, film oyuncıları tarafından, em de çıqaruv yerlerge köre milletlerara olacaq, dep bildire Qırım.Aqiqat.

«Oyuncı erkânımız halqara. İsrail, Sırbistan, Ukraina, qırımtatar oyuncıları... Bu ikâyeni añlatacaq İtshak ihtiyarınıñ rolüni «İdişpil» teatriniñ qurucısı, belli İsrail oyuncısı Şmuel Atsmon oynacaq», – dep levhanıñ rejissöri Ahtem Seytablayev ayttı.

Baş rolge yaş ukrainalı oyuncı davet etildi, onıñ adını şimdilik gizli tutalar.

Seytablayevniñ aytqanına köre, Qırımda filmni çıqarmaq imkânsız olğanından büyük qısmı Gürcistanda çıqarılacaq.

«Gürcistanda Qırım parçasını taptıq», - dep ayttı rejissör.

Filmni İsrailde de çıqaracaqlar. 25 çıqarma künü planladılar.

Beklemelerge köre, 2017 senesine qadar film üzerinde iş bitecek.

«Onıñ yüregi» ukrain tilinde olacaq. Amma filmde alman, qırımtatar ve rus tilleri yanğıracaqtır. .

Filmniñ büceti – 31 million grivna. Olardan 10 mln grn Ukraina devleti ayırıp berecek, 7 mnl grn ödendi. Qalğan paralarnı, qanunlarğa binaen, film üzerinde işler bitken soñ ödenecek.

Filmniñ stsenariyi XX asırnıñ tarihiy adiseleri esasında quruldı ve Ekinci cian cenkinde ölümge mahküm olğan 88 yeudiy balasını qurtarğan Saide Arifova adlı qıznı añlata. Ayatı telükede olsa da, balalarnı evine alıp, İslâm ve Quran adetlerine ogretti, qırımtatar balaları olaraq dep köstere edi.

XS
SM
MD
LG