Kyiv studentleri sürgünlik qurbanlarını añma kününde qırımtatar halqına qoltutıp, qırımtatar bayrağınıñ canlı installâtsiyasını yapmaq isteyler.
Bunı Ukraina haber siyaseti nazirligi Qırım.Aqiqatqa bildirdi.
Aktsiya Ukraina haber siyaseti nazirligi yanındaki Studentler şurası ve T.G.Şevçenko Kyiv Milliy universitetiniñ Studentler parlamenti tarafından teşkil etilecek.
Studentler mayıs 18-de saba Kyiv merkezinde qırmızı bina yanında qırımtatar bayrağı şeklinde turmağa planlaştıralar.
Bundan ğayrı, kün devamında Kyivniñ aliy oquv yurtlarında sürgünlik yıllığına bağışlanğan haber kampaniyasınıñ bir parçası olğan fotoresim sergisi keçirilecek, dep bildirdi nazirlik.
Mayıs 18-i – qırımtatar halqı sürgünliginiñ qurbanlarını añma künüdir. 1944 senesi qırımtatarlar yarımadadan Orta Asiyağa sürgün etildi. Umumen 180 biñ kişi sürgünlikke oğratıldı.
Kyıv ve bütün Ukrainada bir sıra tedbirler keçirilecek: kütleviy mingler, mekteplerde qırımtatar halqınıñ sürgünligine bağışlanğan dersler.
Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
