Mayıs 18-de – qırımtatat halqınıñ genotsid qurbanlarını añma künü tele- ve radio yayınlarında deñişmeler olacağını teleradio şirketlerine Ukraina Milliy tele ve radio yayınları şurası haber etti. Saat 12.00 yayınlarda metronom sesi ozğarması ile sükünet daqqası ilân etilecek.
Bunıñ aqqında Milliy şurasınıñ matbuat hızmeti bildire.
Berilgen malümatqa köre, teleradio şirketleri bu künde eñ azından saate bir kere Hatıra künü aqqında malümat bermege mecburlar.
Em de mayıs 18-de komediya ve erotik filmlerni, mizah, eglenceli ve muzıka yayınları, major sesler ile olğan eserlerni, tele- ve radioviktorinalar, muzıka kösterüvlerni yayında köstermek yasaqladılar.
Erotik ve mizah elementlernen reklamalarnı da köstermek yasaqladılar.
Ukrainada «Mayıs 18-de epimiz – qırımtatarmız»/ «Men genotsidni başımdan keçirdim» adlı haber kampaniyası başlandı.
18 mayıs – Qırımdan qırımtatar halqınıñ sürgünlik qurbanlarını añma künüdir. 1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Er yıl Qırımda sürgün kününe bağışlanğan kutleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilüvi yasaq etildi.
Kyıv ve bütün Ukrainada bir sıra tedbirler keçirilecek: kütleviy mingler, mekteplerde qırımtatar halqınıñ sürgünligine bağışlanğan dersler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
