Link açıqlığı

Saatnıñ esas haberi

Jamala Ukraina Halq artisti oldı


Ukraina prezidenti Petro Poroşenko Jamalağa «Ukraina halq artisti» unvanını berdi, dep bildire Ukraina prezident memuriyetiniñ matbuat merkezi.

«Acayip bir ğalebe. Bir çoq adamnı bahtlı ettiñ», – dep ayttı Poroşenko artistnen körüşken vaqıtta.

Petro Poroşenko qayd etti ki, onıñ ğalebesi al-azırda Ukraina halqı ve hususan qırımtatarlar içün pek müim. Çünki artıq tek diplomatlar degil, adiy insanlar da qırımtatar halqınıñ facialı tarihını ve Qırımnıñ şimdiki işğalini bileler.

«Bütün dünya Ukrainağa qoltuttı ve añlaşıla ki, abstrakt bir Ukrainağa degil, Ukraina ve Qırımğa, qırımtatarlarğa qoltutalar. Qartanañ, onıñ küçük qızı, halqıñ aqqında ikâye – yürekke tiye, qoltutmaq, rey bermek, Qırımnıñ azat etilmesi esnasınıñ parçası olmaq isteysiñ», – dep ayttı Ukraina prezidenti. Onıñ qayd etkenine köre, ömür arqadaşı ve qorantasınen beraber finalnı seyir etip, Jamalağa qoltuttılar.

Devlet yolbaşçısınıñ fikirince, bütün bular yarımadağa ukrain mustaqilligini qaytarmağa yardım etecek.

«Qırımnıñ birinci saifelerde olması içün büyük bir isse qoştıñ», – dep qayd etti Poroşenko Jamalanen laf etip.

Qırımtatarı olğan ukrain yırcısı Jamala (Susanna Camaladinova) 1944 senesi qırımtatar halqınıñ sürgünligini añlatqan «1944» yırınen mayıs 15-ke keçer gecesi İsveçiyanıñ paytahtı Stockholmde olıp keçken «Eurovision» yır yarışınıñ finalında ğalebe qazandı. Ekinci yerni Avstraliya, üçünci yerni Rusiye aldı.

Yarış qaidelerine köre, nevbetteki yarışnı ğalip çıqqan memleket qabul etmeli.

XS
SM
MD
LG