Dnepropetrovsk şeer yolbaşçısı Boris Filatov «Eurovision-2017» yarışını öz şeerinde keçirmek teşebbüsini bildirdi. Bu aqta memurnıñ Ukraina baş naziri Vladimir Groysmanğa yollağan mektübinde bildirile.
Filatovnıñ qayd etkenine köre, yarış paytahtta degil de, diger şeerde keçirilse, bu «ukrain regionlarınıñ inkişafına büyük isse qoşacaqtır".
«Odessa, Lvov, Kiyev ve Harkovdakiler qoşulacaq ve bunıñ içün yarışlaşacaqlar. Bunıñ içün er angi şeer yolbaşçısı v sakini añlaylar ki, bu kibi seviyedeki yarış mütenasip vilâyet merkezinde keçirilse, şeer inkişafına büyük para ayırılacaq ve şeerge çoq yıllarğa reklama olacaqtır», – dedi Filatov.
Kiyev şeer yolbaşçısı Vitaliy Kliçko Ukraina paytahtı kelecek sene keçirilecek «Eurovision» yarışına azırlıq körmege başlağanını bildirdi ve konkurs «Olimpiyskiy» sport kompleksinde keçirilebilecegini qayd etti.
Ukrainanı temsil etken qırımtatar yırcısı Jamala (Susanna Camaladinova) «Eurovision-2016» yarışında ğalebe qazandı. Yarış finalı mayıs 14-te İsveçiya paytahtı Stokgolm şeerinde keçirildi. Jamala 1944 senesi qırımtatar halqınıñ Orta Asiyağa kütleviy şekilde sürgünligi aqqındaki «1944» adlı yırnı icra etti. Konkursta ekinci yerni Avstraliya qazandı, üçünci basamaqta Rusiye yerleşti.
Qaidelerge köre, nebetteki yarış ğalebe qazanğan devlette keçirilmek kerek.
