Rusiye tarafından işğal etilgen Qırım ükümeti Jamalağa ukrain vatandaşlığını Rusiye vatandaşlığına deñiştirmege ve yarımadağa qaytamağa teklif ete.
Bunı rusiyeli TASS devlet haber agentligi, Rusiyege boysunğan Qırım ükümetiniñ baş nazir muavini Georgiy Muradovnıñ sözlerine esaslanıp, bildire.
«Qırım Jamalanıñ sanağa çıqışlarına daima memnün olacağını qayd etem, bu onıñ vatanıdır... Oña tek vatandaşlıq deñiştirilmesinen bağlı bazı şeylerni yapmağa qaldı, vatanğa kelmege ve özünde sanağa çıqmağa», – dedi Muradov.
Ukrainanı temsil etken qırımtatar yırcısı Jamala (Susanna Camaladinova) «Eurovision-2016» yarışında ğalebe qazandı. Yarış finalı mayıs 14-te İsveçiya paytahtı Stokgolm şeerinde keçirildi. Jamala 1944 senesi qırımtatar halqınıñ Orta Asiyağa kütleviy şekilde sürgünligi aqqındaki «1944» adlı yırnı icra etti.
Konkursta ekinci yerni Avstraliya qazandı, üçünci basamaqta Rusiye yerleşti.
Qaidelerge köre, nebetteki yarış ğalebe qazanğan devlette keçirilmek kerek.
