Link açıqlığı

Moskvada bu afta Cemilevniñ FSB-ge qarşı davası boyunca mahkemeden evelki azırlıq yapılacaq – adliyeci


Mustafa Cemilev

Rusiyeli adliyeci Mark Feyginniñ bildirgenine köre, Moskva şeer mahkemesinde qırımtatar halqınıñ lideri Mustafa Cemilevniñ işğal etilgen Qırımğa kirişi yasaq olunğanı boyunca Federal havfsızlıq hızmetine qarşı açtırğan dava boyunca mahkemeden evelki azırlıq mayıs 18-de yapılacaq. Mütenasip beyanatnı adliyeci Twitterde paylaştı.

«MSG FSB-niñ qararını qanunsız tanıması aqqında M.A. Cemilevniñ arizası boyunca vatandaş işi boyunca mahkemeden evelki azırlıq 18.05.2016 tarihına tayinlengenini bildire», – dep bildirile beyanatta.

Bundan da ğayrı, beyanatta bu dava boyunca mahkeme toplaşuvı mayıs 25-te keçirilecegi aqqında aytıla.

Fevral ayında Ukraina prezidentiniñ qırımtatar halqı işlerinden vekâletlisiniñ matbuat hızmeti adliyeci Mark Feygin tarafından qırımtatarlarnıñ milliy lideri Mustafa Cemilevge Qırımğa kirişi qanunsız şekilde yasaq etilgeninden Rusiye Federal havfsızlıq hızmetine qarşı dava açtırğanını haber etken edi.

2014 senesi aprel 22-de Mustafa Cemilevge 5 yıl devamında Qırımğa kelmege yasaq ettiler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG