«Eurovision-2016» yarışınıñ ğalibi Jamalanı «Borispol» ava limanında yüzden ziyade mühlis ve vatandaş qarşıladı. Qırım.Aqiqat mühbiriniñ bildirgen malümatına köre, Stokgolm şeerinden kelgen uçaq «Borispol» ava limanına qonğanda bu yerde sarı-mavı timsallernen, yani devlet bayraqları, qırımtatar milliy bayraqları, kürreçikler ve hayırlav şiarlarınen faaller toplaştı.
Mühlisler Jamalanı muzıka ve oyunlarnen qarşıladı.
«Eurovision-2016» yarışında Ukrainanı temsil etken Jamala (Susanna Camaladinova) bu halqara yır konkursında ğalebe qazandı. Yarış finalı mayıs 14-te İsveçiya paytahtı Stokgolm şeerinde keçirildi.
Avropa yayınlama birliginiñ qaidelerine köre, ğalebe qazanğan iştirakçi nevbetteki sene konkursnı öz devletinde keçirmege aqqını ala, amma onı red ete bile.
Ukraina ekinci sefer«Eurovision» yarışını qabul etecek. İlk sefer yır konkursı Ukrainada 2005 senesi keçirildi. Bundan bir evel, 2004 senesi yarışta Ukraina temsilcisi Ruslana ğalebe qazandı.
