Qırımtatar Qurultayınıñ Merkeziy saylav komissiyasınıñ reisi Zair Smedlâyev mayıs 14-te saba rusiyeli uquq qoruyıcılar Aqmescit civarındaki Abdulla Yuvaşevniñ evinde tintüv keçirgenleri aqqında bildire.
«Qırımtatarlarğa qarşı provokatsiyalar devam ete. Tünevin aqşam Qarasuvbazar rayonınıñ Muşaş (Vişennoye) köyü camisinde tintüv keçirildi, o yere silâlı adamlar olmadı. Bugün saba Aqmescit rayonınıñ Pionerskoye köyüne eki maşinanen – yengil maşina ve «Gazel»nen keldiler. Şimdiki vaqıtta Abdulla Yuvaşevniñ evinde tintüv keçirile», – dep yazdı Smedlâyev içtimaiy ağlarda.
Diger tafsilâtlı malümat bildirilmey.
Uquq qoruyıcı müessiseleri ve yerli prokuraturanıñ izaatları daa yoq.
Bundan evel Qarasuvbazar rayonınıñ Muşaş (Vişennoye) köyü camisinde tintüv keçirilgeni aqqında malümat peyda oldı.
Mayıs 12-de Bağçasarayda rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Dört insan iyül 11-ge qadar yaqalandı.
Aynı bu kün Qırımtatar Milliy Meclisiniñ reis muavini İlmi Umerovnıñ evinde tintüv keçirildi. Onı Rusiye Federal havfsızlığı hızmetinde sorğuğa çektiler, bundan soñ oña Qırımdan çıqışnı yasaq etken vesiqanı berdiler.
Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.
Meclis reisi Refat Çubarov mayıs 12-de yüz bergen vaqialarnı qırımtatarlarğa ücüm dep, adlandırdı.
Ukraina Baş prokuraturasınıñ yanındaki Qırım Muhtar Cumhuriyeti prokuraturası Bağçasarayda mayıs 12-de keçirilgen tintüv ve yaqalanmalar boyunca cinaiy işler açtı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
