Qırımda mayıs 13-te «Aqmescit – Aluşta – Yalta» yolunda qaza yüz berdi. Altı insan elâk oldı, bu cümleden balalar.
Rusiyege boysunğan Fevqulade vaziyetler nazirliginiñ Qırım baş idaresiniñ matbuat hızmetinde bildirilgenine köre, qaza aqqında malümat aqşam saat 20:25 keldi. Yolda Daewoo Lanos и «KAMAZ» maşinaları uruldı. Hızmette tek zararlanğanlar aqqında bildirildi, diger tafsilâtlı malümat yoq.
Rusiyeli GİBDD Qırım idaresiniñ malümatına binaen, qazada altı insan elâk oldı.
«Altı insan elâk oldı, olarnıñ episi Daewoo Lanos avtomobiliniñ yolcuları edi. Bu cümleden 2012 ve 2010 sene doğğan eki bala», – dep bildirdiler müessisede.
Bu yerde qayd etilgenine köre, qaza vaqtında balalar içün maşinada mahsus kreslolar yoq edi.
İlk malümatlarğa binaen, «KAMAZ» maşinası qarşıdan kelgen yolğa çıqtı, neticede avtomobilnen uruldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
