Ukraina Baş prokuraturasınıñ yanındaki Qırım Muhtar Cumhuriyeti prokuraturası işğal etilgen Qırımda Qırımtatar Milliy Meclisiniñ reis muavini İlmi Umerovnıñ yaqalanması boyunca cinaiy iş açtı.
Bu aqta QMC prokuraturasınıñ matbuat hızmeti bildire.
«2016 senesi mayıs 12-de Rusiye Federatsiyası tarafından işğal etilgen Qırım territoriyasında qanunsız şekilde teşkil etilgen havfsızlıq organınıñ – Rusiye Federal havfsızlıq hızmetiniñ silâlı hadimleri, ameldeki Ukraina qanunlarına rağmen, «Qırımdaki prokuratura organlarınıñ» muracaatınen qabul etilgen mahkeme qararlarına esaslanıp, Meclis reisiniñ muavini İlmi Umerovnı yaqaladılar, bundan soñ onıñ evinde tintüv keçirildi», – dep aytıla beyanatta.
Müessisede Umerov Qırımda Rusiye Federatsiyasınıñ topraq bütünligini bozmaq maqsadınen halq ögünde çıqış ve areketlerni yapqanında qabaatlanğanını qayd ettiler. QMC prokuraturasında Qırım Ukrainanıñ işğal etilgen territoriyası olğanını hatırlattılar.
Dava boyunca malümat Ukraina Baş prokuraturasına teslim etildi.
Bundan evel aynı böyle cinaiy işler mayıs 12-de Bağçasarayda keçirilgen tintüv ve yaqalavlar boyunca açıldı.
Mayıs 12-de rusiyeli uquq qoruyıcılar Bağçasarayda musulmanlarnıñ evlerinde ve yerli qavehanede nevbetteki tintüvlerni keçirdi. Bir qaç insan yaqalandı.
Rusiyege boysunğan işğal etilgen Qırım prokurorı Natalya Poklonskaya mayıs 12-de operativ-taqiqat işleri alıp barılğanı, ve neticede «Hizb ut-Tahrir» tarafdarları yaqalanğanı aqqında bildire. Onıñ malümatına köre, 4 insan yaqalandı, 3 Bağçasaray sakinine qarşı cinaiy iş açıldı.
Söz Zevri Abseitov, Remzi Memetov, Rustem Abeltarov ve Enver Mamutov aqqında yürsetile.
Aynı bu kün Qırımtatar Milliy Meclisiniñ reis muavini İlmi Umerovnıñ evinde tintüv keçirildi. Onı Rusiye Federal havfsızlığı hızmetinde sorğuğa çektiler, bundan soñ oña Qırımdan çıqışnı yasaq etken vesiqanı berdiler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
