Link açıqlığı

Qırım Muhtar Cumhuriyeti prokuraturası mayıs 12-de Qırımda keçirilgen tintüv ve yaqalanuvlar boyunca cinaiy işler açtı


Mayıs 12-de Bağçasarayda keçirilgen tintüvler

Ukraina Baş prokuraturasınıñ yanındaki Qırım Muhtar Cumhuriyeti prokuraturası işğal etilgen Qırımda mayıs 12-de yüz bergen vaqialar boyunca cinaiy işler açqanını bildire, o yerde rusiyeli uquq qoruyıcılar musulmanlarnıñ evlerinde bir sıra tintüvler keçirip, insanlarnı yaqaladı.

Bu aqta QMC prokuraturasınıñ matbuat hızmeti bildire.

Müessiseniñ bildirgen malümatına binaen, cinaiy işler qanunsız azatlıqtan marum etüv ve ev toqunmamasınıñ bozuluvı aqqında maddelerge esaslanıp açıldı.

«Qanunsız şekilde vaqtınca işğal etilgen Qırım territoriyasında teşkil etilgen organlar uydurılğan sebepler boyunca, tek Ukraina Ana yasası degil de, halqara aktlar tarafından kefil olunğan esas insan aqları ve serbestligini, şahsiy toqunmaması ve ev toqunmamasını bozalar», – dep ilân ettiler Qırım Muhtar Cumhuriyetiniñ prokuraturasında.

Cinaiy işlerniñ malümatı Ukraina Baş prokuraturasına teslim etildi.

Mayıs 12-de rusiyeli uquq qoruyıcılar Bağçasarayda musulmanlarnıñ evlerinde ve yerli qavehanede nevbetteki tintüvlerni keçirdi. Bir qaç insan yaqalandı.

Rusiyege boysunğan işğal etilgen Qırım prokurorı Natalya Poklonskaya mayıs 12-de operativ-taqiqat işleri alıp barılğanı, ve neticede «Hizb ut-Tahrir» tarafdarları yaqalanğanı aqqında bildire. Onıñ malümatına köre, 4 insan yaqalandı, 3 Bağçasaray sakinine qarşı cinaiy iş açıldı.

Söz Zevri Abseitov, Remzi Memetov, Rustem Abeltarov ve Enver Mamutov aqqında yürsetile.

Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.

Aynı bu kün Qırımtatar Milliy Meclisiniñ reis muavini İlmi Umerovnıñ evinde tintüv keçirildi. Onı Rusiye Federal havfsızlığı hızmetinde sorğuğa çektiler, bundan soñ oña Qırımdan çıqışnı yasaq etken vesiqanı berdiler.

Meclis reisi Refat Çubarov mayıs 12-de yüz bergen vaqialarnı qırımtatarlarğa ücüm dep, adlandırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG