Link açıqlığı

Federal havfsızlıq hızmetiniñ hadimleri mayıs 12-de, cumaaqşamı künü Qırımtatar Milliy Meclisiniñ reis muavini İlmi Umerovnı Bağçasaraydaki evinden alıp, Rusiye Federal havfsızlıq hızmetiniñ idaresine ketirdiler. Bu aqta Meclis reisiniñ birinci muavini Nariman Celâl bildirdi.

«İlmi Umerovnı Federal havfsızlıq hızmetiniñ hadimleri evden Aqmescitteki idarege alıp keteler», – dep yazdı Celâl Facebook saifesinde.

Şimdiki vaqıtta Umerovnıñ yaqalanuvı boyunca tafsilâtlı malümat yoq. Qırım.Aqiqat Qırımdan malümat almağa tırışa.

İlmi Umerov 2002 – 2005 seneleri Qırım Muhtar Cumhuriyeti Yuqarı Şurasınıñ reis muavini edi, 2005 – 2014 seneleri devamında Bağçasaray rayon devlet memuriyetiniñ yolbaşçısı vazifesini eda ete edi.

Mayıs 12-de rusiyeli uquq qoruyıcılar Rusiye tarafından işğal etilgen Qırımda musulmanlarda nevbetteki tintüvlerni keçirdi. Dört insan yaqalandı – Zevri Abseitov, Remzi Memetov, Rustem Abeltarov ve Enver Mamutov.

Rusiyege boysunğan işğal etilgen Qırım prokurorı Natalya Poklonskaya mayıs 12-de operativ-taqiqat işleri alıp barılğanı, ve neticede «Hizb ut-Tahrir» tarafdarları yaqalanğanı aqqında bildire. Onıñ malümatına köre, 4 insan yaqalandı, 3 Bağçasaray sakinine qarşı cinaiy iş açıldı.

Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.

Aprel 17-de Yaltadaki Qızıltaş köyünde rusiyeli uquq qoruyıcılar tintüvler keçirdi, neticede eki qırımtatarnı – Refat Alimov ve Arsen Cepparovnı yaqaladılar. Bundan soñ işğal etilgen Qırımnıñ rusiyeli prokurorı Natalya Poklonskaya eki yaqalanğan Qırım sakini terroristik sayılğan ve Rusiye territoriyasında yasaq etilgen «Hizb ut-Tahrir» teşkilâtınıñ tarafdarları olğanını ilân etti. Aqmescitteki Kiyev rayon mahkemesi Cepparov ve Alimovnı eki ayğa apiste qaldırdı.

Bundan evel Qırımda daa bir sıra yarımada sakinleriniñ yaqalanuvı keçirildi, rusiyeli taqiqat olarnı «Hizb ut-Tahrir» teşkilâtı ile bağlı olğanlarında qabaatlay.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG