Link açıqlığı

Adliyeci Emil Kurbedinov mayıs 12-de Bağçasarayda yaqalanğan musulmanlar Rusiye Federal havfsızlıq hızmetiniñ Qırımdaki idaresine alıp ketirilgenini bildire. O, bu dört yaqalanğan kişini, Rusiyege boysunğan Qırım prokuraturası tarafından «Hizb ut-Tahrir» ile bağ tutqanlarında qabaatlanğan qırımtatarlarnı kibi, maküm eteceklerinde emin.

Böyle fikirni adliyeci Qırım.Aqiqatqa bergen izaatında bildirdi. Bundan da ğayrı, o yaqalanğan insanlarnıñ adlarını ayttı.

«Bir insan terroristik taqımınıñ teşkilâtçısı olaraq mahkemege celp etilecektir. Qalğan üç kişi iştirakçiler olaraq. Aynı şey, aynı şekilde yapıla. Mamutov Enver – o, ihtimal, 205.5 maddeniñ 1-ci qısmı boyunca, yani taqımnı teşkil etüv boyunca maküm etilecektir. Soñra – Abeltarov Rustem, Memetov Remzi ve Abseitov Zevri», – dep bildirdi Kurbedinov.

Adliyeciniñ tahmin etkenine köre, mahkeme bu insanlar boyunca mayıs 13-te, cuma künü qarar alacaqtır.

Kurbedinov Bağçasarayda yüz bergen vaqianı yarımadada qırımtatarlarğa qarşı alıp barılğan repressiyalarnıñ devamı dep, saya.

«Bizde endi 14 insan – qırımtatarlar – bu madde boyunca Qırım territoriyasında. Bunı repressiyalar dep sayam. Başqaca aytıp olamazsıñ», – dep qayd etti adliyeci.

Mayıs 12-de saba Bağçasarayda musulmanlarnıñ evlerinde tintüvler keçirilgeni aqqında bildirildi. Bundan da ğayrı yerli qavehanede tintüv keçirilgeni aqqında malümat peyda oldı, o yerge silâlı insanlarnen eki avtobus keldi.

Rusiyege boysunğan işğal etilgen Qırım prokurorı Natalya Poklonskaya mayıs 12-de operativ-taqiqat işleri alıp barılğanı, ve neticede «Hizb ut-Tahrir» tarafdarları yaqalanğanı aqqında bildire. Onıñ malümatına köre, 4 insan yaqalandı, 3 Bağçasaray sakinine qarşı cinaiy iş açıldı.

Ukraina Tışqı işler nazirligi bu tintüvler yüz bergen soñ Rusiye ükümetinden Qırımda qırımtatarlarğa qarşı alıp barılğan repressiyalarnı toqtatmağa talap etti.

Aprel 17-de Yaltadaki Qızıltaş köyünde rusiyeli uquq qoruyıcılar tintüvler keçirdi, neticede eki qırımtatarnı – Refat Alimov ve Arsen Cepparovnı yaqaladılar. Bundan soñ işğal etilgen Qırımnıñ rusiyeli prokurorı Natalya Poklonskaya eki yaqalanğan Qırım sakini terroristik sayılğan ve Rusiye territoriyasında yasaq etilgen «Hizb ut-Tahrir» teşkilâtınıñ tarafdarları olğanını ilân etti. Aqmescitteki Kiyev rayon mahkemesi Cepparov ve Alimovnı eki ayğa apiste qaldırdı.

Bundan evel Qırımda daa bir sıra yarımada sakinleriniñ yaqalanuvı keçirildi, rusiyeli taqiqat olarnı «Hizb ut-Tahrir» teşkilâtı ile bağlı olğanlarında qabaatlay.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG