Link açıqlığı

Rusiyege boysunğan Qırım prokurorı Natalya Poklonskaya Qırım.Aqiqat saytına kirişniñ blok etilmesi aqqında ilân etti.

«Qırım prokuraturası tarafından toplanılğan malümatqa esaslanıp, Rusiye nezaret komiteti işbu leyhağa kirişni blok etmek içün tedbirler alıp bara», – dep ayttı o rusiyeli «TASS» agentligine.

Bundan evel Rusiyedeki ve Qırımdaki qullanıcılar Qırım.Aqiqatqa kiriş blok etilgeni aqqında bildire edi.

Rusiye nezaret komitetiniñ saytında qayd etilgenine köre, Rusiye Baş prokuraturası 2015 senesi sentâbr 25-te qabul etken qararğa binaen, Qırım.Aqiqatqa kiriş sıñırlana, aynı bu sene sentâbr 30-da qabul etilgen qarar boyunca ise sayt saifesine kiriş sıñırlana.

Böyle qararlarnıñ sebebi, Rusiye nezaret komitetiniñ malümatına binaen, 2006 senesi iyül 27-de qabul etilgen «Malümat, haber tehnologiyaları ve malümatnıñ imayesi aqqında» 149-FZ sanlı Federal qanunınıñ 15.3 maddesi ola.

İşbu qanun qaidesi «İnternet» ağındaki kütleviy nizamsızlıqqa, ekstremistik faaliyetini alıp barmağa ya da nizam bozuvınen keçirilgen kütleviy merasimlerde iştirak etmege çağırğan saytlarğa kiriş sıñırlanuvı nizamını añlata.

Bundan evel Rusiyege boysunğan Qırım prokurorı Natalya poklonskaya Azatlıq Radiosınıñ Qırım.Aqiqat leyhasını tolusınen blok etmek içün vesiqalarnı azırlağanını bildirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG