Qırımtatar Milliy Meclisiniñ vekilleri işğal etilgen Qırımda Rusiyede İnsan aqlarından vekâletli Tatyana Moskalkova ile subetleştiler. Bunı körüşüv iştirakçilerinden biri, Meclis reisiniñ birinci muavini Nariman Celâl bildirdi.
Onıñ aytqanına köre, körüşüv Rusiye ombudsmeniniñ teşebbüsi ile keçirildi.
«Bugün saat 15:00 Qırımtatar Milliy Meclisiniñ vekillerini Rusiye Federatsiyasında insan aqlarından vekâletli Tatyana Moskalkova ile körüşüvge davet ettiler... Moskalkova bizlernen subetleşmege istegeni sayesinde ayrı bir körüşüv olıp keçti, Qırımda insan aqlarınıñ bozulğanını añlattıq», – dep yazdı o Facebookta.
Ayrı bir körüşüv olıp keçti, Qırımda insan aqları bozulğanını añlattıqNariman Celâl
Celâlnıñ qayd etkenine köre, Meclis vekilleri «akimiyet yanındaki teşkilâtlar» kelmese, körüşüv ola bile, dep şart qoyğanlar.
Bunıñnen beraber, Meclis reisiniñ birinci muavini qayd etkenine köre, körüşüv başlamadan ögüne Qırım ombudsmeniniñ ofisine «üç kişi çapa-çapa keldi: spiker muavini, baş nazir muavini ve Milletlerara munasebetler komitetiniñ yolbaşçısı».
Rusiye ombudsmeniniñ matbuat hızmeti bildirgenine köre, mayıs 11-14 künleri Tatyana Moskalkova yañı vazifede Qırımnı ilk sefer iş maqsadınen ziyaret etecek.
Meclis vekilleri «akimiyet yanındaki teşkilâtlar» kelmese, körüşüv ola bile, dep şart qoyğanlar»
Ziyaret programmasında yarımada ve Aqyarnıñ şimdiki reberlikleri, Qırım prokurorı, em de uquq qorçalayıcı teşkilâtları ve Qırımtatar Milliy Qurultayı vekillerinen körüşüvleri planlaştırılğan.
Bundan ğayrı, Tatyana Moskalkova Aqmescitteki №1 SİZOsını ziyaret etmege, Aqyardaki añma komplekslerinden birinde Qırım imayecileriniñ hatırasını añmağa niyetlendi. Rusiye ombudsmeni Aqyar ve Aqmescitte vatandaşlarnen körüşecek ola.
Qırımtatar Milliy Qurultayı Merkeziy saylav komissiyasınıñ reisi Zair Smedlâyev bildirgenine köre, o, yañı Rusiye ombudsmeni Tatyana Moskalkova ile körüşüv davetini almadı. Smedlâyev bu körüşüvde Rusiye akimiyetine qoltutqan qırımtatarlar iştirak etecegini de red etmey edi.
İçki işler nazirliginiñ general-mayorı, Devlet dumasınıñ deputatı Tatyana Moskalkova Rusiyede insan aqlarından vekâletli oldı. O, mart ayında Merkeziy saylav komissiyasınıñ reisi olğan ombudsmen Ella Pamfilovanıñ yerini aldı.
Ukraina ve halqara uquq qorçalayıcı teşkilâtları Rusiye işğalinden soñ Qırımda insan aqlarına riayet etüvniñ vaziyeti kerginleşkenini bildirgen ediler.
Rusiye akimiyeti hususan qırımtatarlar ve yarımadanıñ Ukrainağa qoltutqan ealisine basqı yapqanını qayd eteler.
Rusiye kontrol etken Qırım akimiyeti uquq qorçalayıcılarnıñ yarımadada insan aqlarınıñ bozulmasına dair malümatları qabartıla, dep bildire.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
