Ukraina ekologiya naziri Ostap Semeraknıñ bildirgenine köre, Ukraina Nazirler kabinetiniñ toplaşuvında işğal etilgen Aqyar deñiz yalısı yanında yermay maddeleri tökülgeni aqqında kütleviy haber vastalarında peyda olğan malümatnı muzakere ettiler. Bu aqta o Facebook saifesinde yazdı.
«Qara deñizde Aqyar yanında qaza yüz berdi, neticede deñizge yermay maddeleri töküldi. Tabiat nazirliginiñ regional bölükleri vaqianı ögrenmek, neticelerni belgilemek ve zararğa yol bermemek içün bütün imkânlarnı qullana», – dep bildirdi nazir.
«Bugün ükümet toplaşuvında men bu vaqia aqqında haber ettim, ve nazirge Qırımğa zarar ketirgen işğalci devletniñ ükümetine narazılıq bildirmege muracaat ettim. Ukraina Nazirler kabineti bu teklifke qol tuttı. İşimizni yapamız ve Tışqı işler nazirliginiñ sözüni bekleymiz», – dedi Semerak.
Rusiye tarafından işğal etilgen Aqyar yanındaki Lübimovka, Şimaliy taraf, Belbek, Fiolent, Balıqlava tarafında deñiz üstünde mazut körüne.
Qırımdaki Rusiye tabiat nezareti hızmetiniñ malümatına binaen, mazut mayıs 8-de bir gemiden töküldi. O vaqıt yerli sakinler yalıda bulaşma peyda olğanı aqqında bildirmege başladı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
