Kiyevde «Eurovision-2016» yarışınıñ ekinci yarım final keçirilecek kün, yani mayıs 12-de Ukrainanı temsil etecek qırımlı Jamalağa qol tutmaq içün fleşmob teşkil etilecek. Bu aqta Ukraina Haber siyaseti nazirliginde bildirdiler.
«Bu cumaaqşamı künü Haber siyaset nazirliginiñ Talabeler şurası «Eurovision» yarışında Jamalağa qol tutmaq içün «1944» adlı fleşmobnı keçirmek teşebbüsini bildire. Bundan evel Talebeler şurasınıñ azaları yırcınıñ sesi Avropanıñ bütün halqlarını birleştirgenini köstermek içün #VoiceOfUnity aktsiyasını teşkil etti. Endi ise olar yır yarışında ğalebe içün ukrainlerniñ birligini köstereler», – dep aytıla beyanatta.
Nazirlikniñ malümatına binaen, aktsiya cumaaqşamı künü, saat 11:00 T.G. Şevçenko adına Kiyev milliy universitetiniñ Milletlerara munasebetler institutı yanında keçirilecek.
«Eurovision-2016» yarışınıñ birinci yarım finalı mayıs 10-da Stokgolm şeerindeki «Ericsson Globe» sanasında keçirildi. Finalı ise mayıs 14-te keçirilecek.
61-ci «Eurovision» yır yarışında 42 devlet iştirak ete.
Yarışta Ukrainanı yırcı Jamala qırımtatar sürgünligi aqqında «1944» yırınen temsil ete.
