Link açıqlığı

Emine Ceppar: qırımtatarlar içün tamır halqı statusı – Qırımnıñ işğalden azat etilmesine yol bericidir


Ukraina qırımtatarlarğa bergen tamır halqı statusı – Qırımnıñ Ukraina nezaretine qaytarılmasına yol bere bile. Bu aqta Ukraina Haber siyaseti naziriniñ birinci muavini Emine Ceppar Birleşken Milletler Teşkilâtınıñ Tamır halqları meseleleri boyunca Daimiy forumınıñ 15-ci sessiyasında ilân etti.

«Qırımnıñ işğalden azat etilmesinden soñ tamır halqı, öz-özüni idare etüv aqqı ömürge keçirilse, Qırımda Ukrainanıñ imayecisi olacaqtır», – dep bildire Haber nazirliginiñ matbuat hızmeti Emine Cepparnıñ sözlerini.

Onıñ qayd etkenine köre, Rusiye tarafından işğal etilgen Qırımda tamır halqına nisbeten «bütün seviyelerde, tilden başlap beden zorbalıqlarına qadar, yoq etüv siyaseti» saylandı.

BMT Forumınıñ 15-ci sessiyası mayıs 20-ge qadar devam etecek. Er sene dünya tamır halqlarınıñ temsilcileri BMT sessiyasında toplaşıp, öz halqlarınıñ meselelerini muzakere etip, olarnıñ çezüv yollarını qıdıra. Bu sene merasim «Tamır halqları: dava, barışıq ve qararlar» şiarınen keçirile.

Ukraina Haber nazirliginiñ beyanatında qayd etilgenine köre, qırımtatarlar Forumda qırımtatar halqınıñ temsilci organı Meclis tarafından temsil etile. Eyet terkibine Eskender Bariyev, Ayla Bakkalı ve Aslan Ömer Qırımlı – Nyu-Yorkta Meclis temsilcileri kirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG