Mayıs 9-da, bazarertesi künü Sumı vilâyetindeki «Bolşaya Pisarevka» keçirme noqtasında Ukraina Devlet sıñır hızmetiniñ temsilcilerine Rusiye vatandaşı muracaat etti. O özüne Ukraina territoriyasında siyasiy sığınaqnı soradı, bu aqta müessiseniñ matbuat hızmeti bildire.
«Aqay kişi Ukrainağa yayav kete edi ve Rusiye içki pasportını kösterdi. Bundan da ğayrı, o Rusiyede taqip etilgeni sebebinden qaçaq statusını almağa istegenini birden bildirdi. Ukraina havfsızlıq hızmetinen beraberlikte alıp barılğan közetüv işleri neticesinde işbu vatandaş Ukrainağa qol tutma merasimlerinde, hususan mitinglerde ve diger siyasiy aktsiyalarda faal şekilde iştirak etkeni belgilendi», – dep bildireler Ukraina Devlet sıñır hızmetinde.
Adam ukrain sıñırcılarına o bir qaç kere Rusiye uquq qoruyıcı organlarınıñ hadimleri tarafından tutulğanını añlattı.
Ukraina Devlet sıñır hızmetiniñ malümatına binaen, Rusiye vatandaşı köçüv hızmetiniñ bölügine yollanıldı.
