«Eurovision-2016» yarışınıñ birinci yarım finalı mayıs 10-da keçirilecek, Stokgolm şeerindeki «Ericsson Globe» sanasında soñki azırlıq işleri ve repetitsiyalar alıp barıla.
«Stokgolm şeerinde bayram müiti. Mayıs 9-da saba erte yarışqa azırlıq başlandı, mikrofonlar, sana, yarıq, ses – er şey yahşı çalışmalı ve birinci yarım finalğa azır olmalı. Aqşam birinci yarım finalnıñ bütün 18 iştirakçisi esas repetitsiyağa toplaştı. Repetitsiyada esas seyir etüvlerge biletler alğan seyirciler, jüri ve konkurs supervayzeri Yon Ula Sann bulundılar», – dep bildire yarışnıñ resmiy saytı.
61-ci «Eurovision» yır yarışında 42 devlet iştirak ete. Konkursnıñ yarım finalları mayıs 10 ve 12 künleri, finalı ise mayıs 14-te keçirilecek.
Yarışta Ukrainanı yırcı Jamala qırımtatar sürgünligi aqqında «1944» yırınen temsil ete.
