Travel.ru rusiyeli turistik hızmeti Rusiye tarafından işğal etilgen Qırımnı turistler ziyaret etken Rusiye şeerleriniñ cedveline kirsetti. Cedvelge Yalta ve Aqyar kirsetildi.
Portal bergen malümatqa binaen, top-10 cedveline mayıs bayramlarında Sankt-Peterburg, Moskva, Qazan, Soçi, Yalta, Nijniy Novgorod, Kaliningrad, Yekaterinburg, Velikiy Novgorod ve Yaroslavl kirdi.
Yaltada musafirhaneler eñ paalı sayıldı, bu yerde turistler künde 5 biñden ziyade ruble bere edi.
Moskva, Sankt-Peterburg ve Aqyar mayıs 9-da eñ populâr oldı, dep qayd eteler portalda.
Reyting 2016 senesi mayıs 1-den 10-ğa qadar turistik şirketlerine muracaat etmeyip, öz başına seyahat etken turistlerniñ musafirhanelerde oda ayırtuvı boyunca malümatqa esaslanıp yapılğan.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
