Qırımtatar halqınıñ aq-uquqlarını saqlav boyunca komitetniñ idarecisi, Meclis azası Eskender Bariyev Birleşken Milletler Teşkilâtınıñ Tamır halqlar meseleleri boyunca daimiy forumında iştirak etti. Bu aqta Bariyev mayıs 9-da Facebook saifesinde bildirdi.
«İstiqrarlı inkişaf ve mekân» mevzusı muzakere etilgende sözde bulundım. İstiqrarlı inkişafnıñ nevbetteki, fikirimce, müim olğan kriteriylerni qayd ettim: ükümet tamır halqlarnıñ öz-özüni teşkil etüv organlarınıñ teşkil etilmesini, işini ve inkişaf etmesini yasaq etmemeli ve mania olmamalı; tamır halqlar ükümet organlarında, tamır halqlarnıñ menfaatını qorçalağan qararlarnı qabul etmek içün, adekvat şekilde temsil etilmeli; topraq, topraqastı ve tabiat resursları ükümet ve ticariy müessiseler tarafından tek tamır halqınen uyğunlaşma bar olğan alda qullanılmalı», – dep yazdı Bariyev Facebook saifesinde.
Bundan da ğayrı, o, tamır halqlarnıñ toprağı ve tabiat resurslarını qullanğan ticariy müessiseler tamır halqlarnıñ inkişafına tazminat tölemek mecbur olğanını; ükümet tamır halqlarnıñ tasil alması içün şarait yaratmaq mecbur olğanını; tamır halqlarnı tıbbiy hızmetlernen teminlemek, bala doğmasını çoqlaştırma, analar sağlığınıñ eyileştirilmesi ve balalar ölüvini eksiltmesi içün şarait yaratmaq, bundan da ğayrı, tamır halqlarnıñ ayatınen bağlı biznes inkişafına yol bermek mecbur olğanını qayd etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
