Qırımtatar Milliy Meclisiniñ reisi, Ukraina Yuqarı Radası deputatı Refat Çubarov Avropa Birligini Rusiyege qarşı sanktsiyalarnı daa qattı yapmağa, hususan, iç olmasa, vaqtınca yermayğa embargo kirsetmege, ve Rusiye Federatsiyasını SWIFT halqara bank ağları sistemasından kesmege çağırdı.
Bu aqta Çubarov «Gromadske TV» ukrain telekanalınıñ yayınında bildirdi.
«Qırımtatarlarğa qarşı repressiyalar daa qattı olğanı sebebinden halqara toplulıq Rusiyege qarşı sanktsiyalarnı daa qattı yapmalı», – dedi Çubarov.
Mayıs 12-de Avropa Parlamenti Rusiye tarafından qırımtatarlarnıñ aqları bozuluvı boyunca rezolütsiyanı muzakere etecek. Kün mevzusında Rusiye tarafından işğal etilgen Qırımda qırımtalarlarğa nisbeten demokratiya qaideleri ve aq-uquqlarnıñ bozulması meselesi muzakere etilecektir.
Aprel 26-da Rusiye ükümetine boysunğan Qırım Yuqarı mahkemesi Qırımtatar Milliy Meclisini ekstremistik teşkilâtı olaraq tanıdı ve onıñ faaliyetini Rusiyede yasaq etti. Amnesty International Halqara uquq qoruyıcı teşkilâtı bu qararnı takbih etti.
2014 senesi Meclis Qırım işğaline qarşı çıqtı. 2015 senesi sentâbr 20-de Rusiye tarafından işğal etilgen Qırımğa yük maşinalarınıñ blok etilmesi boyunca müddetsiz aktsiya başlandı. Onıñ maqsadı siyasiy mabuslarnı azat etmesi, Qırımğa halqara nezaretçilerniñ maniasız kirmesi, yarımadada qırımtatarlarğa qarşı repressiyalarnı toqtatmasıdır.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
