Link açıqlığı

«Donetsk Halq Cumhuriyeti» ve «İslam devleti» taqımlarınıñ bayraqları kibi qırımtatar bayrağını da «Eurovision-2016» yarışında açmağa yasaqladılar. Yır yarışınıñ teşkilâtçıları keçken afta yayınlağan bayraqlarnıñ cedvelini alıp qoydılar. Bayraqlarnıñ qullanuvını yañı vesiqada qayd etildi. Qoşulğan 42 memleketniñ ya da Birleşken Milletler Teşkilâtına kirgen memleket bayraqlarınıñ qullanuvı içün ruhset berildi.

Ukrainalı yırıcı Jamalanıñ mühlisleri Stockholmnıñ kontsert zalında qırımtatar milliy bayrağını açamazlar. «Eurovision-2016» yır yarışınıñ teşkilâtçıları iştirak etecek 42 memleketniñ ya da Birleşken Milletler teşkilâtına kirgen memleketlerniñ bayraqlarından ğayrı başqa bayraqlarnıñ qullanmasını yasaq ettiler.

Kontsert zalında açması yasaq olğan bayraqlarnıñ cedveli keçken afta soñunda yır yarışınıñ resmiy saytında peyda oldı. Yasaq etilgen bayraqlar cedveline qırımtatarlarnıñ milliy bayrağı, «Donetsk Halq Cumhuriyeti» ve «İslâm devleti» bayraqları kirdi. «Eurovision-2016» yır yarışınıñ bağ bölüginiñ reberi Paul Jordan Radio Svobodağa bunıñ yañlış olğanını aydınlattı.

«Keçken afta yayınlanğan vesiqa derc etilmemek kerek edi. Şimdi ise saytta episi kriteriyler bar. Biz iç bir bayraqnı ya da yerni «İslâm devletiniñ» bayrağı ile qıyaslamaq istemedik, evelki vesiqa içün afu soraymız. Canı ağırğan er kesten afu soraymız», – dep qayd etti yarışnıñ resmiy vekili.

Saytta yañı vesiqa peyda oldı

Yañı vesiqada LGBT birleşmesi (Lesbian, Gay, Bisexual, Transgender community) ve Avropa birligi bayraqlarınıñ qullanması izin berildi. Yasaq etilgen bayraqlarnıñ hususiyetleri: reklam, ayırım ya da siyasiy ve diger levhalar.

Konkret bir memleketke ya da yerge qarşı çıqmaq içün değil, mantıqlı bir qaide tizmek içün qanunlar qabul etildi. Aynısı qırımtatar bayrağına da ait
Paul Jordan

«Bayraqlarnen bağlı ayrı talimatlar bar. Misal olaraq, bayraqnıñ çubuğı madeniy ya da tahta olamaz, tek plastik ola bile. Bayraq iç bir siyasiy bilgi taşımaycaq. Bu bayraqlar iştirak etken memleketler ya da Birleşken Milletler Teşkilâtına kirgen diger memleketlerge ait ola bile. «Donetsk Halq Cumhuriyeti» (Ukrainada terrorist tanılğan gruppirovka – QA) bayrağı yer davalı olğanı içün degil, bayraq «Eurovision-2016» yarışına qoşulğan bir memleketni temsil etmegeni içün yasaqlandı. Konkret bir memleketke ya da yerge qarşı çıqmaq içün değil, mantıqlı bir qaide tizmek içün qanunlar qabul etildi. Aynısı qırımtatar bayrağına da ait. O iştirak etken memleket ve Birleşken Milletler Teşkilâtına kirgen bir memleketniñ bayrağı degil, bu sebepten böyle qarar. Bu qarar Qırımğa qarşı qabul etilmedi. Meselâ, İskoçiyanıñ milliy bayrağı da yasaq altında», – dep ayttı Paul Jordan Radio Svobodağa.

Yır yarışınıñ teşkilâtçıları qayd eteler ki, qanunlarnıñ yerine ketirilmesi tedbirniñ telükesizlik hızmeti tarafından közetilecek ve bir de bir bozuv olsa, bayraqnı saqlamağa talap etecekler.

Bu sene yır yarışında Ukrainanı Jamala qırımtatarlarnıñ sürgünligini añlatqan «1944» yırınen temsil etecek. ​

Çubarov Jamalanıñ çıqışına qoltutmağa çağırdı​

«Bu «Eurovision» yarısınıñ bayraqlarnen bağlı resmiy siyaseti. Biz onı ürmet etemiz ve qabul etemiz », – dep ayttı Radio Svobodağa Jamalanıñ PR-müdiri Denis Kozlovskiy.

Teşkilâtçılar bu yarışnıñ Kreml tarafından siyasetleştirüv neticesinde peyda ola bilecek manialarğa yol bermemege tırışalar
Refat Çubarov

Qırımtatar Milliy Meclisiniñ reisi Refat Çubarov öz Facebook saifesinde bu meseleni şu şekilde izaatladı: «Elbet de, men bu qararnı begenmedim, amma bu aqnı olarğa kaldıram – teşkilâtçılar bu yarışnıñ Kreml tarafından siyasetleştirüv neticesinde peyda ola bilecek manialarğa yol bermemege tırışalar».

Refat Çubarov Jamalağa qoltutmağa çağırdı.

«Eurovision-2016 » yarışınıñ yarım finalları Stokgolm şeerinde mayıs 10 ve 12 künleri, finalı ise mayıs 14-te keçirilecek. Jamala ekinci yarım finalda 15-inci olaraq sanağa çıqacaq.

Radio Svoboda

Metnniñ asıl nushası – ​Radio Svoboda saytında

XS
SM
MD
LG