Qırım adliyecisi Cemil Temişev mayıs 6-da Aqmescit rayonınıñ Molodöjnoye köyünde rusiyeli uquq qoruyıcılar yapqan areketlerine mahkemede itiraz bildirmege teklif etti. Bu aqta adliyeci Facebook saifesinde yazdı.
«Bugün Molodöjnoye köyünde yaqalanğanlarğa muracaat etem. Uquq qoruyıcılarnıñ areketlerine mahkemede itiraz bildirmege azır olğanlar bar ise, maña şahsiy mesaj yazıñız», – yazdı Temişev.
Qırım.Aqiqatqa bergen izaatta Cemil Temişev şimdilik rusiyeli uquq qoruyıcı müessiseleri temsilcilerine qarşı mahkemege muracaat etmege istegenler yoq olğanını bildirdi.
Cemil Temişev Qırımtatar Milliy Meclisiniñ faaliyeti Rusiye tarafından işğal etilgen Qırım territoiyasında yasaq etilmesi davası boyunca imaye tarafında adliyeci vazifesini eda etti.
Mayıs 6-da cuma namazından soñ Molodöjnoye köy camisinde 50-den ziyade silâlı insan musulmanlarnı yaqaladı. Resmiy sebep – vesiqalarnıñ teşkerilmesi. Uquq qoruyıcılarnıñ malümatına binaen, tahminen 100 adam yaqalandı.
Qırım ve Sevastopol şeeri musulmanları diniy idaresinde (QMDİ) Qırım musulmanlarına şahıs şeadetnamelerini yanında taşımağa tevsiye ettiler.
Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.
Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
