Link açıqlığı

Geniçesk rayonındaki Çonğar köyü yanında «Qırım vatandaşlıq qamaçavı» aktsiyası keçirilgen territoriyada keçken yoldan maşinalar içün mania olğan beton blokları alındı.

Bu aqta Qırım.Aqiqatqa Herson regional qırımtatar meclisiniñ reisi Lenur Lümanov bildirdi.

«O yerde yanvar 16-dan başlap blokpostlar yoq. Beton taşları kerek olmağanı sebebinden yoldan alındı», – dedi Lümanov.

Qamaçav faalleriniñ añlatqanlarına köre, blokpostlar bu sene yanvar 16-da yoq etilgen, amma yolda beton blokları qalğan.

Aynı vaqıtta, aktsiya keçirilgen territoriyada maskalanğan çadırlar şeerçigi tura, o yerde faaller buluna.

Aprel 20-de Ataman sakinleri yazğan mektübinde Herson vilâyet devlet memuriyetininiñ reisi vazifesini icra etken Valentina Siçevayadan Qırım qamaçavı faalleriniñ blokpostlarını regiondan yoq etmege talap etti. Çonğar köy şurasınıñ deputatı Valeriy Koblük muracaatnı oqudı. Muracaatta 180 imza qoyulğan. Köy sakinleri Qırım ile memuriy sıñırğa yaqın yerleşken köyler territoriyasında bulunğan Qırım qamaçavı iştirakçileri tarafından nizam bozulmasına şikâyet ete.

Bundan da ğayrı, vesiqada «Çonğar» Kiriş-çıqış nezaret noqtası yanında yerleştirilgen «Qırımtatar muhtar cumhuriyeti» yazısı ile işaret boyunca qasevet çekilgeni aqqında bildirile.

2015 senesi sentâbr 20-de, Qırımğa mahsulat ve malnı alıp ketken yük naqliyeni blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlandı. 2016 senesi yanvar ayı ortasında, teşkilâtçılarnıñ sözlerine köre, Qırım qamaçavı boyunca aktsiyanıñ şekli deñişti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG