Mayıs 6-da Zaporojye vilâyetindeki Melitopol şeerinde qırımtatarlar qayd etken Hıdırlez bayramı teşkil etildi. Merasimni Melitopol şeer yolbaşçısı Sergey Minko ve Zaporojye vilâyeti regional meclisiniñ reisi Ridvan İbraimov açtılar. Bu aqta Qırım tarihçısı Gulnara Bekirova Facebook saifesinde yazdı.
«Ava salqın olğanına baqmadan, bayram sıcaq müitte keçti. Şeer akimiyeti ve şeer milliy cemiyetleriniñ temsilcileri, yerli sakinler Melitopol qırımtatarlarınıñ musafirleri oldı. Bu yerde «Güzel Qırım» yır ve oyun qırımtatar halq ansambli, «Çereşnâ» veteranlar horı, Melitopol qaray cemiyetiniñ oyun taqımı kontsert programmasını taqdim ettiler. Adet üzre bayram pilâv ve muzakerelernen yekünlendi», – qayd etti Gulnara Bekirova.
Kiyevde Hıdırlez bayramı mayıs 7-de «Qırım alanında» («Krımskaya polâna») «PaskaFest» festivali çerçivesinde keçirilecek. Ziyaretçilerni Qırım aşları, master-klasslar bekleycek, bu yerde suvenirlerni satın almaq ve hayriye lotereyada iştirak etmek, Cemil Karikov yolbaşçılığında «Maqam» muzıka mektep-studiyası iştirakçileri tarafından ananeviy qırımtatar aletlerinen çalığnan qırımtatar halq muzıkasını diñlemek mümkün olacaq.
Rusiye tarafından işğal etilgen Qırımda bu bayramğa bağışlanğan merasim mayıs 3-te teşkil etile. İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.
Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.
Hıdırlez türk halqlarınıñ eñ büyük bayramlarından biri ola, onı XIX asırda üç kün devamında qayd ete ediler. Onı mayıs 6-da, Hıdır (al-Hıdır) ve İlyas azizleriniñ yer yüzünde körüşkenleri künü olaraq qayd eteler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
