Link açıqlığı

Geniçesk rayonında qırımtatar sürgünligi qurbanlarına bağışlanğan merasimler keçirilecek


Herson vilâyetindeki Geniçeskte mayıs 18-de Qırımdan sürgün etilgen qırımtatarlarnıñ qurbanlarını añma kününe bağışlanğan miting teşkil etilecek. Bu mesele mayıs 6-da Geniçesk rayon devlet memuriyetiniñ binasında keçirilgen teşkiliy komitetniñ toplaşuvında muzakere etildi.

Teşkiliy komitetniñ toplaşuvını memuriyet yolbaşçısınıñ muavini Gulnara Bekirova keçirdi. Toplaşuvda yerli akimiyet, cemaat birleşmeleri ve yerli qırımtatar meclisleriniñ temsilcileri iştirak etti.

«Bu akimiyet organları ve milliy öz-özüni idare etüv organları arasındaki bağ Qırım ve qırımtatarlarnıñ mayıs 18-de sürgünliginen bağlı meseleler ortaq olğanını, bizim umumiy ağrımız olğanını kene de tasdıqladı», – dep Qırım.Aqiqatqa izaat berdi Gulnara Bekirova.

Onıñ sözlerine binaen, bu sene mayıs 18 kününe bağışlanğan merasimlerni rayon seviyesinde keçirmege qarar alındı. Mekteplerde hatıra dersleri berilecek, rayonda bu mevzuğa bağışlanğan plakatlar yerleştirilecek.

Bundan da ğayrı, memuriyet yolbaşçısınıñ muavini mayıs 18-de saat 11:30-da yerli meclisler Geniçesk rayonında qırımtatarlar toplu yaşağan yerlerde mitingler keçirecegini, saat 12:00-de bütün Ukraina hatıra aktsiyasında iştirak etecegini, saat 12:30-da avto yürüş teşkil etecegini, saat 13:00-te ise Geniçeskte miting keçirilecegini bildirdi.

Bundan ğayrı, Qırım vatandaşlıq qamaçavı aktsiyasınıñ spikeri Evelina Arifova Qırım.Aqiqatqa izaat berip, Geniçeskte miting keçirilgen soñ Qırım memuriy sıñırı yanında merasimler teşkil etilecegini qayd etti.

Qırımtatar halqınıñ sürgünlik qurbanlarına bağışlanğan miting er sene Novoalekseyevka köyünde teşkil etile edi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG