Link açıqlığı

Aqmescitte mahkeme terrorizmde qabaatlanğanlarnı apiste qaldırdı


Rusiyege boysunğan Qırım Yuqarı mahkemesi 25 yaşındaki Arsen Cepparovnıñ apiste qaldırmaq qararını lâğu etmek muracaatını qanaatlendirmedi. Arsen Cepparov «Hizb ut-Tahrir» ile bağ tutqanında şeklenilip uquq qoruyıcılar tarafından yaqalandı.

Bunı «Mühbir taqiqatları merkezi» («Tsentr jurnalistskih rassledovaniy») agentligi bildire.

Yigitniñ soy-sopları neşirge bildirgen malümatqa binaen, mahkeme qararına onıñ kiçik qızı bar olğanı tesir etmedi.

Aynı böyle qarar dava boyunca qabaatlanğan diger kişi Refat Alimovğa qarşı da alındı. Ekisi de iyün 18-ge qadar apiste bulunacaq.

Aprel 17-de Yaltadaki Qızıltaş köyünde rusiyeli uquq qoruyıcılar tintüvler keçirdi, neticede eki qırımtatarnı – Refat Alimov ve Arsen Cepparovnı yaqaladılar.

Bundan soñ işğal etilgen Qırımnıñ rusiyeli prokurorı Natalya Poklonskaya eki yaqalanğan Qırım sakini Rusiyede terroristik teşkilâtı olaraq tanılğan ve yasaq olğan «Hizb ut-Tahrir» teşkilâtınıñ tarafdarları olğanını bildirdi.

Aqmescitteki Kiyev rayon mahkemesi Cepparov ve Alimovnı eki ayğa apiste qaldırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG