Link açıqlığı

Qırımda rusiyeli uquq qoruyıcılar camilerde insanlarnıñ vesiqalarını teşkere. Mayıs 6-da Aqmescit rayonınıñ Molodöjnoye köyünde OMON hadimleri böyle etip yüzden ziyade musulmannı tuttı. Aynı böyle ihtarnı Qarasuvbazar (Belogorskoye) şeerindeki cami imamı aldı.

Bu aqta Qırım.Aqiqatqa Qırım kontakt gruppasınıñ idarecisi Abdureşit Cepparov bildirdi.

«Şimdiki vaqıtta bulunğanım Molodöjnoye köyüni ziyaret etmezden evel men Qarasuvbazarda cuma namazında edim. O yerde imam, bundan evel bu yerge de OMON hadimleri kelgenini ve cami ziyaretçileri yanında vesiqalarını tutmaları kerek olğanı aqqında haber etkenlerini ayttı... Sebepler – rusiyeli sağlamsızlıqtır. Añlañız, sebepler yoq. Bugün bütün dünya musulmanları namazdalar», – dedi Cepparov.

Bundan evel Emil Kurbedinov mayıs 6-da cuma namazından soñ Molodöjnoye köyü camisinde 50-den ziyade silâlı insan yüz musulmannı tutıp, belli olmağan tarafqa alıp ketkenini bildirdi. Bundan soñ o, insanlarnı avtobuslardan azat etip yibergenlerini, amma musulmanlardan politsiyağa mustaqil şekilde kelmelerini talap etkenlerini bildirdi.

Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.

Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG