Mayıs 6-da silâlı insanlar Aqmescit rayonındaki camide namazdan soñ tutqan ve alıp ketken musulmanlarnı avtobuslardan azat ettiler, amma politsiya bölügine kelmelerini talap ettiler. Bu aqta adliyeci Emil Kurbedinov bildire.
«Er kesni avtobuslardan azat etmege mecbur oldılar. Amma musulmanlarğa mustaqil şekilde politsiya bölügine kelmege emir ettiler», – dep yazdı Kurbedinov Facebook saifesinde.
Bundan evel Aqmescit rayonındaki Molodöjnoye köyünde yerleşken camige silâlı insanlarnıñ kelgenleri ve olar cuma namazından soñ yüzden ziyade musulmannı alıp ketmege tırışqanları aqqında malümat peyda oldı.
Bu malümat diger menbalarda tasdıqlanmadı.
Yüz bergen vaqia boyunca Qırımnıñ rusiyeli uquq qoruyıcı müessiseleriniñ resmiy izaatları yoq.
Qırım Rusiye tarafından işğal etilgen soñ qırımtatarlarnıñ evlerinde, camilerde pek çoq tintüvler keçirilip başladı, bunı Meclis ve uquq qoruyıcılar qayd ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
