Adliyeci Emil Kurbedinovnıñ bildirgenine köre, rusiyeli taqiqat tarafından «Hizb ut-Tahrir» ile bağ tutqanlarında qabaatlanğan Qırım musulmanlarını Rusiyede, mayıs 18-de, qırımtatar sürgünligi yıllığı kününde mahküm etmege planlaştıralar.
«2016 senesi mayıs 18-de Rostov-na-Donu şeerindeki arbiy mahkemede terrorizmde qabaatlanğan dört Qırım musulmanını – qırımtatarlarnı mahküm etecekler. Zeytullayev Ruslan, Vaitov Rustem, Primov Nuri, Sayfullayev Ferat. Tesadufmı?» – dep yazdı Kurbedinov Facebook saifesinde.
Bundan evel adliyeci yuqarıda qayd etilgen qırımlılar dava işinen tanış olğanını bildirgen edi.
2015 senesi qışta Aqyarda dört musulman kişi yaqalandı: Ruslan Zeytullayev, Rustem Vaitov, Nuri Primov ve Ferat Sayfullayev. Olarnı Rusiyede «ekstremistik» sayılğan «Hizb ut-Tahrir» teşkilâtı ile bağ tutqanlarında qabaatlaylar.
«Hizb ut-Tahrir» halqara islâm siyasiy firqası ola. Onıñ resmiy olaraq qayd etilgen maqsadı islâm devletini qurmaq ve musulman yaşayış tarzını tiklemektir. Bu teşkilât Rusiye, Qazahistan ve Almaniyada yasaqlanğan, amma Ukraina ve diger devletlerde onıñ faaliyeti yasaq degil.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
