Link açıqlığı

Birleşken Milletler Teşkilâtı forumında qırımtatar halqına bağışlanğan konferentsiya keçirilecek – Cemilev


Tamır halqları meseleleri boyunca Birleşken Milletler Teşkilâtınıñ daimiy forumında (UNPFII) «Tamırlı qırımtatarlar: ayatta qalma ve aq-uquqlarnı teminleme yolları» mevzulı konferentsiya keçirilecek. Bunı Qırımtatarlarnıñ meseleleri boyunca Ukraina prezidentiniñ vekâletlisi Mustafa Cemilevniñ matbuat hızmetinde bildireler.

«Merasim mayıs 10-da Nyu-York şeerinde Tamır halqları meseleleri boyunca Birleşken Milletler Teşkilâtınıñ daimiy forumınıñ 15-ci sessiyası çerçivesinde teşkil etilecek. Belli qırımtatar ve halqara ekspertlerniñ iştiragi ile muzakerelerniñ keçirilmesi beklenile», – dep aytıla beyanatta.

Bundan evel, mayıs 12-de Avropa parlamentinde Rusiye tarafından işğal etilgen yarımada territoriyasında qırımtatarlarnıñ aq-uquqları bozuluvı aqqında muzakerelerniñ keçirilmesi planlaştırılğanı aqqında bildirile edi.

Qırım Rusiye tarafından işğal etilgen soñ ukrain ve halqara uquq qoruyıcı teşkilâtları daima yarımadada Ukraina tarafını tutqan ve qırımtatar ealisiniñ aq-uquqlarınıñ bozuluvı aqqında bildire. Amma Qırımnıñ rusiyeli ükümeti ve Kreml bu malümatnı red ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG