Link açıqlığı

Celâl: Qırımda mayıs 6-da mahkeme Çiygoznıñ apiste bulunma müddetiniñ uzattırılmasını lâğu etmek muracaatını baqaçaq


Rusiye tarafından işğal etilgen Qırımda Kremlge boysunğan Yuqarı mahkeme mayıs 6-da Qırımtatar Milliy Meclisiniñ reis muavini Ahtem Çiygoznıñ apiste bulunma müddetiniñ uzattırılmasını lâğu etmek muracaatını baqaçaq. Bu aqta Meclis reisiniñ muavini Nariman Celâl Facebook saifesinde yazdı.

«Yarın, saat 9:00-da Aqmescitte Yuqarı mahkemede Aqmescitteki Kiyev rayon mahkemesi tarafından 29.04.2016 qabul etilgen Ahtem Çiygoznıñ apiste bulunma müddetini mayıs 22-ge qadar uzattırmaq qararını lâğu etmek Çiygoznıñ imayecileri bergen muracaatı baqılacaq», – bildirdi Celâl.

Aprel 29-da mahkemede Çiygoz onıñ Qırımnı terk etmege niyeti yoq olğanını ve o telükeli olmağanını kene de ilân etti.

Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. 2016 senesi fevral ayında rusiyeli Qırım Yuqarı mahkemesiniñ toplaşuvında bu işni tekrar taqiq etilmesine yollamağa qarar alındı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG