Qırımtatar Milliy Meclisiniñ reis muavini Nariman Celâl mayıs 4-te Facebook saifesinde Rusiyege boysunğan Qırım Yuqarı mahkemesiniñ Meclis boyunca qararınıñ nushasını paylaştı.
«Aman-aman bütün kün devamında Emine Avamileva ile mahkemedemiz. Tek aqşamğa yaqın, niayet, qararnı alıp oldıq... Tanış oluñız – Meclisniñ yasaq etilmesi aqqında qarar, Rusiye «adaletiniñ» nevbetteki timsali», – dep yazdı Celâl.
Mahkeme qararı 21 saifeden ibaret. Derc etilgen vesiqada, hususan, «bu iş, «Cemaat birleşmeleri aqqında» Federal qanunınıñ 47-ci maddesine binaen «Qırımtatar milliy meclisi» halqara cemaat teşkilâtı olmağanı sebebinden, mahkeme qaidelerine riayet etip baqılğanı» aqqında bildirile.
Mahkemeciler qararda «Meclis faaliyetiniñ yasaq etilmesi qırımtatar halqınıñ siyasiy, iqtisadiy, içtimaiy ve medeniy aqlarınıñ bozulmasına yol bermeycek, halqnıñ öz-özüni ifade etüv esas aqqına mania olmaycaq» dep yazdılar.
Aynı vaqıtta, cevapkâr davanı qabul etmegeni aqqında bildirile. Bunen beraber, mahkemeniñ qararında imaye delilleri qayd etilmegen, amma, bunen beraber, mahkemeciler vesiqağa yarımadada «qırımtatar halqınıñ aqları ve menfaatını saqlağan 30-dan ziyade cemaat birleşmesi faaliyetini alıp barğanı» aqqında malümatnı yazdı.
Bu qararnı lâğu etmek içün bir ay devamında muracaat etmek mümkün.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Halqara toplulıq Rusiye ükümetiniñ Meclis faaliyetini yasaq etmek qararını takbih etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
