Link açıqlığı

Sürgünlik yıllığına bağışlanğan malümat kampaniyası Ukrainada mayıs 5-te başlanacaq – Emine Ceppar


Ukraina Haber siyaseti nazirligi qırımtatar halqı sürgünliginiñ nevbetteki yıllığına bağışlanğan «Genotsidni başımdan keçirdim» malümat kampaniyasını başlay. Bu aqta nazir muavini Emine Ceppar Facebook saifesinde bildirdi.

Malümat kampaniyasınıñ taqdimi mayıs 5-te, cumaaqşamı künü teşkil etilecek. Matem kününe nazirlik 5 video azırladı.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG