Link açıqlığı

Saatnıñ esas haberi

Emine Ceppar: yaqın vaqıtta ukrain kütleviy haber vastaları Qırım sakinleri içün irişile bilgen olur


Emine Ceppar
Emine Ceppar

Ukrainada, işğal etilgen Qırım ile memuriy sıñırğa yaqın, 150 metrlik qulle qoymaq içün şahsiy yatırımcı tapıldı. Qulle yardımınen ukrain televizion ve radio kanalları Qırım sakinleri içün irişile bilgen olur.

Bu aqta Ukraina haber siyaseti naziriniñ birinci muavini Emine Ceppar Qırım.Aqiqat Radiosınıñ saba yayınında bildirdi.

«Bu şahsiy yatırımcı ve o bu qulleni pek tez tiklemege azır. Şimdiki vaqıtta topraq meselesi çezile. Herson vilâyetiniñ devlet memuriyeti bu meseleniñ çezilmesine qoşuldı. Olar şimdi qıdıracaqlar. Anda qulle qoyulacaq yerniñ bir qaç variantı bar. Çonğarda bu qulle olacaq. Ve bu qulle tiklenilse, o vaqıt quvetli bericilerni qoymaq ve, iç olmasa, Aqmescitke qadar (dalğalarnı – QA) bermege tırışmaq mümkün olacaq», – dedi o.

Fevral ayında Ukraina televizion ve radio yayınlaması boyunca Milliy şurasında Herson vilâyetiniñ cenübinde ve Qırımda yayınlamanı ğayrıdan tiklev boyunca iş gruppası teşkil etilgeni aqqında bildirile edi. Gruppa «devletniñ cenübinde haber saasını, haber mustaqilligini qorumaq maqsadınen» teşkil etildi.

Bundan evel Herson ükümeti rusiyeli telekanallar Qırımdan Herson vilâyetine Krasnoperekopskta (Qırım MC – QA) yerleşken televizion qullesi vatsasınen yayınlağanını bildire edi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG