«Demokratik teşebbüsler» fondunıñ müdiri İrina Bekeşkinanıñ fikirince, Ukraina haber saasında işğal etilgen Qırım pek az añıla. Ve yarımada aqqında daa çoq halqara siyasette laf eteler.
Böyle fikirni o Qırım.Aqiqat Radiosınıñ saba yayınında bildirdi.
«Qırım meselesini unutmaq mümkün degil. Elbet, Qırım meselesini açmaq kerek. Amma, mence, içki siyasetke baqqanda, halqara siyasette bu mesele daa çoq muzakere etile. Kerçek aytsam, Qırım aqqında az qonuşamız. O yerde neler olğanını, belli sebeplerden, bilmeymiz. Amma, bellessem, bu aqta laf etmek kerekmiz», – dedi içtimaiyatçı.
Programmanıñ diger musafiri, Ukraina haber siyaseti naziriniñ birinci muavini Emine Ceppar ukrain kütleviy haber vastalarında yarımada aqqında malümatnıñ yeterli derecede olğanını qayd ete. Onıñ fikirince, işğalden soñ Qırım aqqında daa çoq laf etmege başladılar.
«Közetmelerime köre, şimdiki zamanda olğanı kibi, Qırım aqqında iç bir vaqıt o qadar çoq laf etmey ediler. Umumen olaraq resmiy Kiyevde olğan muzakerelerni alsaq, ve ilâhre, Qırım aqqında o qadar çoq laf etmey ediler. Bellesem, milliy telekanallarnıñ seviyesini alsaq, olarnıñ haberlerine baqsaq, Qırım aqqında eñ azdan bir qaç haber er kün bar», – qayd etti Emine Ceppar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
