Link açıqlığı

Uquq qorçalayıcılar Refat Alimovnıñ işini kontrol altına aldılar


Abdureşit Cepparov Refat Alimovnıñ anası Emine Lümanova ve soy-sopları ile

Mayıs 1-de Qırım insan aqları kontakt gruppasınıñ koordinatorı Abdureşit Cepparov Qızıltaş (Krasnkamenka) qasabasında apiske alınğan musulman Refat Alimovnıñ qorantasını ziyaret etti.

Refat Alimovnıñ em tuvğanları, em dostları Qırım insan aqları kontakt gruppasınıñ koordinatorı ile körüşmek içün keldiler. Abdureşit Cepparov kelgenlerniñ aytqanlarını diñlep qayd etti ve ilerideki adımları boyunca tevsiyelerde bulundı.

Aprel 12-de Federal havfsızlıq hızmeti Refat Alimovğa qarşı cinaiy iş açtı, amma Refatnı apiske alğan soñ aprel 23-te qorantasını haberdar ettiler.

Refat Alimovğa qarşı açılğan cinaiy iş haberi
Refat Alimovğa qarşı açılğan cinaiy iş haberi

Refatnıñ anası Emine Lümanovanıñ aytqanına köre, aprel 18-de saba erte oğluna kölmeklerini yuvmaq içün uyandı. Çamaşırlarnı asmağa çıqqanda azbarlarına üç maşina yaqınlaşqanını kördi. Bular Rusiye uquq qoruyıcıları edi.

Rusiye uquq qoruyıcıları oğlan yaşağan evde tintüv keçirgenler. Onıñ sistem blokunı, diniy filmler olğan disklerni alıp, Federal havfsızlıq hızmetiniñ Qırım idaresine alıp ketkenler. Al-azırda o Aqmescitte SİZOda yata. Refat Rusiyede terrorist sayılğan «Hizb ut-Tahrir» teşkilâtında iştirak etüv ile şeklene.

Emine Lümanova
Emine Lümanova

«Oğlumnıñ bir qabaatı yoq. Onı babasız östürdim. Olarnı bir özüm terbiyeledim, üç balam bar – eki qızım ve oğlum. Saba işke ketip, aqşam qayta edi. Aytılğan teşkilâtlarğa ne vaqıt barsın, bilmeyim. Balam SİZOda yata, bağımız yoq demem mümkün, bir şeyler yollaymız», – dep ayta Emine Lümanova.

Oğlannıñ iş yerinden kelgen hasiyetname anasınıñ sözlerini isbatlay, o, bütünley işke dala edi. Ticaret vekili olaraq çalışıp fayda ketire, işdeşleri ürmet etile ve tertip-nizamnı bozmay edi.

Refat Alimovnıñ iş yerinde berilgen hasiyetnamesi
Refat Alimovnıñ iş yerinde berilgen hasiyetnamesi

Refatnıñ köydeşleri de oğlan aqqında tek müsbet şeyler aytıp, oña qoltutmaq içün imzalarını toplağanlar.

Refat Alimovnıñ köydeşleri toplağan imzalar
Refat Alimovnıñ köydeşleri toplağan imzalar

Refatnıñ anası pek qasevetlene, o hastadır. Oğlu – qorantasını baqa.

Bu sene fevral 12-de mında yerli musulman cemiyetiniñ 53 yaşındaki iştirakçisi Enver Bekirovnıñ evinde tintüv olıp keçti. O, Emine Lümanovanıñ üç doğmuş ağası ola. «Oğlum Enver dayısı oña tek yahşı şeylerni ögretkenini ayta edi – içki içmemek, ibadet etmek, vicdanlı olmaq», – dep paylaştı körüşüvde Refatnıñ anası.

Soy-soplarınıñ aytqanına köre, şimdi apiste yatqan genç Rusiye Federatsiyası Anayasasınıñ 51-inci maddesini, «İç kimse özüne, ömür arqadaşı ve federal qanun belgilegen eñ yaqın tuvğanlarına qarşı malümat bermege mecbur degil» kibi aqqını, qullana.

Abdureşit Cepparov bildirdi ki, Refat Alimovnıñ işi Qırım insan aqları kontakt gruppasınıñ nezareti altında bulunacaq. «Sizge yardım etmek içün elimizden kelgenini yapacaqmız», – dep vade etti o apiske alınğan oğlannıñ soy-soplarına.

XS
SM
MD
LG