Link açıqlığı

Saatnıñ esas haberi

Berlinde Qırımtatar sürgünligi qurbanlarınıñ hatırasına çıraqlardan Qırım haritası yapılacaq


Berlin şeerinde Almaniyadaki Ukraina elçiliginde 1944 senesi sovet ükümeti tarafından yarımadadan qırımtatar halqınıñ sürgün etilmesi matem kününe bağışlanğan merasimler teşkil etilecek.

Merasimler Berlin qırımlıları tarafından, ukrain toplulığı ve alman «Zulum etilgen halqlarnı qoruv boyunca cemiyeti»niñ destegi ile teşkil etile.

Mayıs 18-de aqşam elçilikte bu mevzuğa ait sergi, qırımtatarlar ve işğalge qarşı turma aqqında filmniñ taqdim etilmesi planlaştırıla.

Teşkilâtçılarnıñ malümatına binaen, merasimlerden soñ elçilikte «Yüregiñde çıraq yaq» aktsiyası keçirilecek. Çıraqlardan qırımtatarlarnıñ vatanı olğan Qırım haritasını yapmağa isteyler. İstegenlerni qoşulmağa davet eteler.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

2016 senesi aprel ayında Rusiyege boysunğan Qırım Yuqarı mahkemesi Qırımtatar Milliy Meclisiniñ faaliyetini yarımadada yasaq etti.

1944 senesi mayıs 18-de yarımadadan Orta Asiyağa qırımtatarlarnen ilk eşelon yollandı.

XS
SM
MD
LG